Тропарь Всемилостивому Спасу
С вышних призирая, убогия приемля, посети нас озлобленныя грехи, Владыко всемилостиве, молитвами Богородицы, даруй душам нашим велию милость.
Тропари водосвятные
К Богородице прилежно ныне притецем грешнии и смиреннии, и припадем, в покаянии зовуще из глубины души: Владычице, помози, на ны милосердовавши: потщися, погибаем от множества прегрешений: не отврати Твоя рабы тщи, Тя бо и едину надежду имамы.
Потщися — поспеши.
Не умолчим никогда, Богородице, силы Твоя глаголати недостойнии: аще бо Ты не бы предстояла молящи, кто бы нас избавил от толиких бед? кто же бы сохранил доныне свободны? Не отступим, Владычице, от Тебе: Твоя бо рабы спасаеши присно от всяких лютых.
Еже радуйся Ангелом приимшая, и рождшая Зиждителя Твоего, Дево, спасай Тя величающия.
Воспеваем Сына твоего, Богородице, и вопием: Пречистая Владычице, всякия беды избави рабы Твоя.
Царем, пророком, и апостолом, и мучеником Ты еси похвала, и предстательница миру, всенепорочная.
Язык всяк православных похваляет, и блажит, и славит пречистое рождество Твое, Марие богоневестная.
Слава: Отца и Сына славословим, и Духа Святаго, глаголюще: Троице Святая, спаси души наша.
И ныне: Неизреченно в последняя заченшая, и рождшая Создателя Твоего, Дево, спасай Тя величающия.
